APTF VIZAG: పిల్లల్లో కరోనా - తల్లితండ్రులకు మార్గదర్శకాలు

పిల్లల్లో కరోనా - తల్లితండ్రులకు మార్గదర్శకాలు

1) సెకండ్ వేవ్ ,మొదటి వేవ్ కన్నా ఎందుకు ఎక్కువ ప్రమాదకారిగా ఉంది? 

మొదటి వేవ్ లో సోకిన వైరస్ ఎప్పటికప్పుడు ఎన్నో మార్పులు చెంది రెండో వేవ్ లో చాలా శక్తవంతంగా, మనం మునుపెన్నడూ చూడని విధంగా తయారయింది. మొదటి వేవ్ లాక్ డౌన్ ముగిశాక  మనందరం అప్పటిదాకా చూపిన జాగ్రత్తలూ, నియమాలూ అన్నీ గాలికొదిలి విచ్చలవిడిగా తిరగడం వల్ల రెండో వేవ్ మొదలైంది. 

ఇప్పుడున్న "మారిన వైరస్" (Mutated virus) తక్కువ సమయంలోనే ఇంటిల్లిపాదికీ సోకడం వల్ల పిల్లలూ, పెద్దలూ అందరూ దీని బారిన పడుతున్నారు. చాలా వరకు, ఇలాంటి ఉత్పరివర్తనం చెందిన వైరస్ ఇన్ఫెక్షన్లు (Mutated virus) 6 నెల్ల నుండి సంవత్సరానికి ఒకసారి విజృంభిస్తూ ఒక రెండేళ్ల పాటు అందరికీ సోకి తర్వాత కనుమరుగు అయిపోతాయి. 

2) పిల్లల్లో కరోనా వైరస్ సోకకుండా ఉండాలంటే ఎలాంటి జాగ్రత్తలు తీసుకోవాలి? 

 కరోనా అనేది అమాంతం 2019 లోనే పుట్టింది కాదు, వేలాది సంవత్సరాలుగా మానవుడిలో స్వల్ప శ్వాస కోశ, జీర్ణాశయ ఇన్ఫెక్షన్ లకి కారణం అవుతున్న వందలాది వైరస్ లలో ఇది కూడా ఒకటి . ఇది 2019 లో ఉత్పరివర్తనం (Mutation) చెంది శక్తివంతంగా అభేధ్యంగా మారి ఇవాళ ఇంత వినాశనానికి కారణం అయింది. 

కరోనా రాకుండా ఆపడానికి ఎలాంటి మందులూ లేవు, ఇన్ఫెక్షన్ సోకిన తర్వాత వ్యాధి లక్షణాల్ని బట్టి మందులు వాడాల్సి ఉంటుంది.  వ్యాక్సిన్ కూడా కరోనా తో పోరాడడానికి యాంటీ బాడీలని ఉత్పత్తి చేయడానికి సహకరిస్తుంది తప్ప కరోనా రాకుండా ఆపలేదు.

కరోనా నివారణకు మార్గం - ఎల్లప్పుడూ మాస్క్ ధరించడం, బైటికి వెళితే కనీసం 6 అడుగుల సామాజిక దూరం పాటించడం, ఎప్పటికప్పుడు చేతులు శుభ్రంగా కడుక్కోవడం/ సానిటైజేషన్ చేసుకోవడం . 

పిల్లలను, గ్రూపులుగా ఆడుకోవడం/ఆడించడం, అందరూ గుంపులుగా ఉండే చోట్లకు తీసుకువెళ్లడం లాంటివి చేయకుండా ఉంటే, వాళ్ళలో కరోనా సోకే అవకాశం దాదాపు లేదు

3) పిల్లల్లో వచ్చే జ్వరము, దగ్గు కరోనా వల్ల కలిగినవే అని ఎలా తెలుసుకోవాలి?  

జ్వరం, జలుబు ఎన్నో వైరస్ ఇన్ఫెక్షన్ల వల్ల కలగొచ్చు, అన్ని జ్వరాలు, జలుబు కరోనానే అనలేం. కానీ ఇంట్లో ఎవరికైనా కరోనా పాజిటివ్ గా నిర్ధారణ అయితే, పిల్లల్లో కూడా కరోనా పరీక్ష చేయించడం మంచిది. 

4) పిల్లల్లో ఎలాంటి లక్షణాలు ఉన్నప్పుడు కరోనా అని అనుమానించవచ్చు ? 

జ్వరం, దగ్గు, జలుబు, ఒళ్ల నొప్పులు, కళ్ళు ఎర్రబడడం ఇవన్నీ కరోనా లక్షణాలే. ఇప్పడు సెకండ్ వేవ్ లో వీటితో పాటూ, కడుపు నొప్పి, వాంతులు, విరోచనాలు, కాళ్ళూ చేతులు బొబ్బలెక్కడం, దురదలు పెట్టడం లాంటి లక్షణాలు కూడా ఉంటున్నాయి.

5) పిల్లలలో కరోనా పరీక్ష  ఎప్పుడు చేయించాలి? జ్వరం రాగానే చేయించాలా? 

పిల్లల్లో జ్వరం మూడు రోజుల కంటే ఎక్కువ ఉన్నా,  

జ్వరం తో పాటూ ఇతర లక్షణాలు ఏమైనా ఉన్నా,

కుటుంబ సభ్యుల్లో ఎవరికైనా కరోనా సోకినా, తక్షణం పిల్లలకు పరీక్ష చేయించడం మంచిది. 

6) ఏ పరీక్ష చేయించాలి ?

RTPCR ఖచ్చితమైన ఫలితాలు ఇస్తుంది, ఇది అందుబాటులో లేకపోతే Rapid Antigen Test (RAT) అయినా చేయించవచ్చు. 

RAT పరీక్ష పాజిటివ్ వస్తే కరోనా సోకినట్టు, అదే నెగటివ్ వస్తే మాత్రం, RTPCR చేసి "కరోనా లేదు" అని నిర్ధారించుకోడం ముఖ్యం. ఛాతీ CT స్కానింగ్ పిల్లల్లో అవసరం లేదు, ఒకవేళ చేసినా వైద్యుని సలహాతో మాత్రమే చేయాలి. 

7) తల్లికి కరోనా సోకితే పిల్లలకి పాలు పట్టవచ్చా? ఆ పరిస్థితుల్లో ఎలాంటి జాగ్రత్తలు తీసుకోవాలి ? 

తల్లికీ బిడ్డకీ పాజిటివ్ అని నిర్ధారించబడితే

తల్లీ బిడ్డలు ఓకే గదిలో ఉండవచ్చు, పాలు కూడా పట్టవచ్చు

తల్లికి పాజిటివ్, బిడ్డ కి నెగటివ్ ఉంటే - మాస్క్ వాడుతూ, ఎప్పటికప్పుడు సానిటైజేషన్ చేసుకుంటూ బిడ్డకి పాలు పట్టవచ్చు. 

బిడ్డకి పాజిటివ్, తల్లితండ్రులకు నెగటివ్ ఉంటే - పేరెంట్స్ PPE కిట్స్ వేసుకుంటూ, తాము జాగ్రత్తగా ఉంటూ బిడ్డ ఆలనా పాలనా చూసుకోవచ్చు . 

ఇంట్లో తల్లితండ్రులకు కరోనా సోకగానే, పై జాగ్రత్తలు పాటిస్తూ పిల్లలని మీ వద్దే ఉంచుకోవచ్చు. లేదా పిల్లలకి కరోనా పరీక్ష చేసి, నెగటివ్ అని నిర్ధారణ అయితేనే , వాళ్ళని తాతయ్య/అమ్మమ్మ ల దగ్గర వదిలి వచ్చే ఆలోచన చేయాలి. ఎందుకంటే, పిల్లల ద్వారా వృద్ధులకు కరోనా సోకి వాళ్ళ ప్రాణాలకు ముప్పు ఏర్పడే అవకాశాలు ఎక్కువగా ఉన్నాయి. 

8) పిల్లలు కూడా తప్పనిసరిగా ఫేస్ మాస్క్ వాడాలా? 

 Indian Academy Of Pediatrics (IAP) ఆదేశాల ప్రకారం రెండేళ్ల పైబడ్డ పిల్లలు అందరూ తప్పనిసరిగా మాస్క్ వాడాలి. రెండేళ్ల లోపు పిల్లలకు మాస్క్ అవసరం లేదు.

9) పెద్దవారిలో లాగానే పిల్లల్లో కూడా కరోనా ప్రమాదకరమా ? 

కరోనా సోకిన పిల్లల్లో 60-65% మందికి అసలు ఎలాంటి లక్షణాలు కనపడడం లేదు. లక్షణాలు కనపడే ఆ మిగతా 35-40% పిల్లల్లో కూడా 1-2% వారికి మాత్రమే PICU (Pediatric Intensive Care Unit) లో  చికిత్స అవసరం అయ్యే పరిస్థితి వస్తుంది. 

10) అంటే పిల్లల్లో కూడా అతి కొద్ది మందికి మాత్రమే తీవ్ర లక్షణాలు కనపడతాయి అన్నమాట.  ఏ ఏ పిల్లల్లో తీవ్ర లక్షణాలు కనపడే అవకాశం ఉంది? ముందే ఊహించలేమా? 

 దీర్ఘ కాల కాలేయ, కిడ్నీ, గుండె వ్యాధులు ఉన్న పిల్లలకు, పుట్టుక తోనే రోగనిరోధక శక్తి తక్కువ ఉండే జబ్బులు (Immuno deficiency disorders)  ఉన్న వారిలోనూ, రోగ నిరోధకతని తగ్గించే కేన్సర్ లాంటి రుగ్మతలు ఉన్న వారిలోనూ, ఊబకాయుల్లోనూ కరోనా తీవ్రతరం అయ్యే అవకాశాలు ఉన్నాయి. 

11) కరోనా సోకిన పిల్లల్ని హాస్పిటల్ కి తీసుకెళ్ళి మందులు ఇప్పించడం కాకుండా, ఇంకేమైనా మార్గాలు ఉన్నాయా? 

ఈ రోజుల్లో ఎన్నో On Line Consultations /Tele Consultation సంస్థల ద్వారా వైద్యులతో నేరుగా ఇంట్లో ఉండి సంభాషించి, చికిత్స తీసుకునే వెసులుబాటు ఉంది. 

అంతే కాకుండా, స్వల్ప లక్షణాలు ఉన్న /ఏ లక్షణాలూ లేని పిల్లల్ని వైద్యుని దగ్గరకు తీసుకెళ్లే తొందరలో, పిల్లల నుండి కరోనా మరింత మందికి సోకే అవకాశం ఉంది.

ఇంకా వివరాలకోసం 

Indian Academy Of Pediatric (IAP) , AIIMS , WHO వెబ్ సైట్ సందర్శించగలరు. 

అలా కాకుండా, ఎలాంటి తీవ్ర లక్షణాలు ఉన్నా, తాత్సారం చేయకుండా  పిల్లల్ని వెంటనే వైద్యుని దగ్గరకు తీసుకెళ్లాలి. 

12) కరోనా సోకి స్వల్ప లక్షణాలున్న పిల్లలకి ఇంట్లో వాడదగ్గ మందులూ, చిట్కాలు ఏమైనా ఉన్నాయా?

ప్రతి ఆరుగంటలకు ఒకసారి పిల్లల టెంపరేచర్ చెక్ చేయాలి, ఒకవేల జ్వరం 99.5 F కంటే ఎక్కువ ఉంటే, పారాసెటమాల్ (10-15 mg/kg/dose) ఇవ్వాలి. 

ప్రతి రోజు 3 పూటలు పల్స్ ఆక్సేమీటర్ తో ఆక్సీజన్ లెవెల్స్ చెక్ చేస్తూ ఉండాలి. 95 కంటే తక్కువ ఉంటే వెంటనే మీ వైద్యున్ని సంప్రదించాలి.

ఎక్కువగా నీళ్లు/ద్రవాహారం , సాత్వికాహారం ఇస్తూ ఉంటూ, ఎప్పటికప్పుడు చేతులూ, కాళ్ళూ శుభ్రంగా ఉంచుకోవాలి. 

డాక్టర్ సలహాతో జింక్, విటమిన్ సప్లిమెంట్స్ కూడా ఇవ్వొచ్చు. 

13) పెద్ద వారిలో కరోనాకి వాడే మందులు (Ivermectin, Doxycycline, Hydroxy Chloroquine etc) పిల్లల్లో వాడవచ్చా ? 

అలాంటివేం అవసరం లేదు. ఆయుర్వేదం/హోమియోపతి మందులు కూడా అవసరం లేదు. తీవ్ర లక్షణాలతో PICU లో అడ్మిట్ అయిన పిల్లలకు మాత్రం వారి వ్యాధి తీవ్రతను బట్టి స్టెరాయిడ్స్ ( Steroids), రక్తం చిక్కబడకుండా ఇచ్చే మందులు (blood thinners), యాంటీ వైరల్ మందులు (Remdesivir) లాంటివి ఇవ్వవచ్చు. 

14) పిల్లల్లో ఎలాంటి లక్షణాలు ఉంటే కరోనా తీవ్రత ఎక్కువ ఉంది అని భావించాలి? ఎప్పుడు వెంటనే హాస్పిటల్ కి తీసుకువెళ్లాలి ? 

4/5 రోజులకు మించి అధిక జ్వరం/ఎడతెగని దగ్గు, 

శ్వాస తీసుకోవడం లో ఇబ్బంది, ఎగ శ్వాస ఉండడం, ఆయాసం, ఆహారం మింగలేకపోవడం,  వాంతులు/విరోచనాలు తగ్గకపోవడం,  చాలా సేపు నిద్ర పోతుండడం/అపస్మారక స్థితిలోకి వెళ్ళడం ( Drowsiness/ unconscious), ఆక్సీజన్ లెవెల్స్ 95 కంటే తగ్గడం, లాంటివి ఉంటే వెంటనే వైద్య సహాయం తీసుకోవాలి

15) దీర్ఘ కాల అవయవ సంబంధ వ్యాధులకి ( chronic organ dysfunction), పుట్టుకతో వచ్చే రోగ నిరోధకతా లోప వ్యాధులకి (Immuno deficiency disorders) , దీర్ఘ కాల శ్వాస కోశ సంబంధ వ్యాధులైన ఆస్తమా/అలెర్జీ లాంటి వాటికి (Hyper Reactive Airway Disease) స్టెరాయిడ్/ఇతర మందులు వాడుతున్న పిల్లలు, కరోనా సోకినప్పుడు ఆ మందులు వాడవచ్చా ? ఆపేయాలా? 

నిస్సంకోచంగా స్వల్ప లక్షణాలు ఉన్న పిల్లలు ఆ మందులు అన్నీ వాడవచ్చు, ఆపాల్సిన అవసరం లేదు. ఒకవేళ కరోనా తీవ్ర లక్షణాలతో, హాస్పిటల్ లో చికిత్స అవసరమైన పిల్లలకు మాత్రం , వైద్యుల సలహాతో ఆ మందులు కొన్నాళ్ళు ఆపాల్సిన అవసరం రావచ్చు. 

16) కరోనా సోకిన పిల్లలకి ఇతర వ్యాధులు రాకుండా ఇచ్చే టీకాలు ( Routine Immunization ) ఎన్నాళ్ళకి ఇవ్వాలి? 

లక్షణాలు తగ్గిన 2 వారాల తర్వాత ఆ టీకాలు వేయించవచ్చు . ఒకవేళ తీవ్ర లక్షణాలతో PICU లో చేరి ఎక్కువ మొత్తంలో స్టెరాయిడ్ మందులు (High Dose Steroids) , TOCILIZUMAB లాంటి మందులు వాడాల్సి వచ్చిన పిల్లల్లో, కోలుకున్న తర్వాత 3 నెలలకి టీకాలు ఇవ్వచ్చు. 

17) పాలిచ్చే తల్లులు కరోనా వాక్సిన్ తీసుకోవచ్చా ? 

ప్రభుత్వం ఇప్పటి వరకూ జారీ చేసిన మార్గదర్శకాల ప్రకారం, గర్భిణులు, పాలిచ్చే తల్లులు, 18 ఏళ్ల లోపు వారూ కరోనా వాక్సిన్ తీసుకోకపోవడం మంచిది.

No comments:

Post a Comment

Featured post

D.EL.Ed 1st Year SPOT Results- 2022 (2018-20 Batch)